Viveka Murder case: ముందస్తు బెయిల్‌ పిటిషన్‌ను ఉపసంహరించుకున్న ఎంపీ అవినాష్‌రెడ్డి

హైదరాబాద్‌: మాజీ మంత్రి వైఎస్‌ వివేకానందరెడ్డి హత్య కేసులో తనను అరెస్టు చేయకుండా ముందస్తు బెయిల్‌ కోరుతూ ఎంపీ వైఎస్‌ అవినాష్‌రెడ్డి తెలంగాణ హైకోర్టులో దాఖలు చేసిన పిటిషన్‌ను ఉపసంహరించుకున్నారు. నిన్న దాఖలు చేసిన పిటిషన్‌ను 24 గంటలు తిరగకముందే ఎందుకు ఉపసంహరించుకున్నారనే అంశం చర్చనీయాంశంగా మారింది. ఇటీవల తనపై సీబీఐ కఠిన చర్యలు తీసుకోకుండా ఆదేశించాలని కోరుతూ అవినాశ్‌ దాఖలు  చేసిన పిటిషన్‌ను తెలంగాణ హైకోర్టు నిరాకరించిన విషయం తెలిసిందే.

ఈ నేపథ్యంలోనే మంగళవారం ఆయన ముందస్తు బెయిల్‌ మంజూరు చేయాలని కోరుతూ ఉన్నత న్యాయస్థానంలో పిటిషన్‌ దాఖలు చేశారు. ఇప్పటికే పలుసార్లు సీబీఐ ముందు హాజరై వాంగ్మూలం ఇచ్చినట్లు పిటిషన్‌లో పేర్కొన్నారు. వివేకా హత్యకేసు విచారణలో భాగంగా సీబీఐ అడిగిన అన్ని ప్రశ్నలకూ సమాధానం ఇచ్చినట్లు తెలిపారు. ఫిబ్రవరి, మార్చిలో పలుసార్లు సీబీఐ విచారణకు హాజరై దర్యాప్తునకు పూర్తిగా సహకరించినట్లు వివరిస్తూ.. ఈ కేసుకు సంబంధించి ముందస్తు బెయిల్‌ మంజూరు చేయాలని న్యాయస్థానాన్ని కోరారు. అయితే, ఈ ఇప్పుడు ఆ పిటిషన్‌ను ఎందుకు వెనక్కి తీసుకున్నారు? అనే అంశం ఆసక్తికరంగా మారింది.