Viral news: ఏళ్లుగా సహజీవనం.. ఒకేసారి ముగ్గురితో పెళ్లి!

భోపాల్‌: ఒకరు కాదు.. ఇద్దరు కాదు.. ఏకంగా ముగ్గురితో సహజీవనం చేశాడో వ్యక్తి. ఇప్పుడు ఆ ముగ్గురినీ వివాహం చేసుకున్నాడు. అదీ ఒకే వేదికపై. మధ్యప్రదేశ్‌లోని అలీరాజ్‌పూర్ జిల్లాకు చెందిన 42 ఏళ్ల సమర్థ్‌ మౌర్య గతంలో సర్పంచిగా పనిచేశాడు. 2003 నుంచి ఆయన ముగ్గురితో సహజీవనం చేస్తున్నాడు. ఇప్పటికే వారికి ఆరుగురు పిల్లలు. ఈ నేపథ్యంలో తాజాగా గిరిజన సంప్రదాయం ప్రకారం ఒకే వేదికపై ముగ్గురినీ పెళ్లి చేసుకున్నాడు. వారి ఆరుగురు పిల్లలూ ఈ కార్యక్రమంలో పాల్గొనడం గమనార్హం. ఈ వ్యవహారం కాస్త సామాజిక మాధ్యమాల్లో వైరల్‌గా మారింది.

ఈ విషయమై మౌర్య మాట్లాడుతూ.. 2003లో తన మొదటి భాగస్వామితో పరిచయం ఏర్పడిందన్నాడు. 15 ఏళ్లుగా మరో ఇద్దరూ తనతో కలిసి ఉంటున్నారని  చెప్పాడు. ఈ క్రమంలో ఏప్రిల్‌ 30న ఒకే మండపంలో నాన్‌బాయి, మేళా, సక్రీలను పెళ్లి చేసుకున్నాడు. డోలు వాయిద్యాల నడుమ గిరిజన ఆచారాల ప్రకారం మూడు రోజులపాటు ఈ కార్యక్రమం ఉత్సాహంగా సాగిందని గ్రామస్థులు తెలిపారు.