TS News: సీఎస్‌, డీజీపీకి జాతీయ ఎస్సీ కమిషన్‌ నోటీసులు

హైదరాబాద్‌: యాదాద్రి భువనగిరి జిల్లా అడ్డగూడూరు పోలీస్‌స్టేషన్‌లో దళిత మహిళ మరియమ్మ(55) పోలీస్‌ కస్టడీలో అనుమానాస్పద మృతిపై జాతీయ ఎస్సీ కమిషన్‌  స్పందించింది. సీఎస్‌, డీజీపీ, యాదాద్రి భువనగిరి జిల్లా ఎస్పీ, డిప్యూటీ కమిషనర్‌కు కమిషన్‌ నోటీసులు పంపింది. ఈ ఘటనపై ఏం చర్యలు తీసుకున్నారో తెలిపాలని ఆదేశించింది. వారంలోగా సమాధానం ఇవ్వాలని జాతీయ ఎస్సీ కమిషన్‌ పేర్కొంది. 

దొంగతనం కేసు విచారణలో భాగంగా ఖమ్మం జిల్లా చింతకాని మండలం కోమట్లగూడకు చెందిన అంబడిపూడి మరియమ్మను అడ్డగూడూరు పోలీసులు విచారించారు. ఈ క్రమంలో భాగంగా పోలీస్‌ కస్టడీలో ఆమె మృతిచెందింది. దీంతో ఆ ఠాణా పోలీసులపై ఆరోపణలు వెల్లువెత్తడంతో అధికారులు విచారణ చేపట్టారు. అనంతరం ఎస్సై మహేశ్‌, కానిస్టేబుళ్లు రషీద్‌, జానయ్యలను సస్పెండ్‌ చేస్తూ రాచకొండ సీపీ మహేశ్‌ భగవత్‌ ఉత్తర్వులు జారీ చేశారు. ఈ ఘటన రాష్ట్ర వ్యాప్తంగా సంచలనమైన విషయం తెలిసిందే.