నిజనిర్థారణ కమిటీ వేయాలి: తెలంగాణ

దిల్లీ: రాయలసీమ ఎత్తిపోతల పథకంపై దాఖలైన పిటిషన్‌పై మంగళవారం ఎన్జీటీ చెన్నై బెంచ్‌లో విచారణ జరిగింది. పనులు ఆపేయాలని ఎన్టీటీ ఆదేశించినా ఏపీ ప్రభుత్వం ఎత్తిపోతల పథకం పనులు కొనసాగిస్తోందని తెలంగాణకు చెందిన గవినోళ్ల శ్రీనివాస్‌ కోర్టు ధిక్కరణ పిటిషన్‌ దాఖలు చేసిన విషయం తెలిసిందే. దీనిపై విచారణ చేపట్టిన ఎన్జీటీ.. ప్రాజెక్టు నిర్మాణ పనులు చేపట్టొద్దని పునరుద్ఘాటించింది. పనులు జరుపుతున్నారన్న పిటిషనర్‌ అభ్యంతరాలపై సమాధానం ఇవ్వాలని కృష్ణానది యాజమాన్య బోర్డును ఎన్జీటీ ఆదేశించింది. ఈ వ్యవహారంపై నిజనిర్థారణ కమిటీ వేయాలని తెలంగాణ తరఫు న్యాయవాది కోరారు. నిజనిర్థారణ కమిటీ వేయాలన్న తెలంగాణ వినతిపై కూడా వివరణ ఇవ్వాలని కృష్ణా బోర్డుకు ఎన్జీటీ ఆదేశాలు జారీ చేసింది. తదుపరి విచారణ ఫిబ్రవరి 24కు వాయిదా వేసింది.