Rythu Bandhu: పదెకరాలకు పైగా ఉన్నవారికి మొత్తంగా ఇస్తోంది ₹250 కోట్లే: నిరంజన్‌రెడ్డి

హైదరాబాద్‌: రైతుబంధు పథకం కింద 9వ విడతలో లబ్ధిదారులకు రూ.7,508 కోట్లు ఇస్తున్నట్లు రాష్ట్ర వ్యవసాయ శాఖ మంత్రి సింగిరెడ్డి నిరంజన్‌ రెడ్డి తెలిపారు. పదెకరాలకు పైగా ఉన్న లబ్ధిదారులకు మొత్తంగా అందిస్తోంది కేవలం రూ.250 కోట్లు మాత్రమేనని చెప్పారు. హైదరాబాద్‌లో మంత్రి మీడియాతో మాట్లాడారు. ఈ రెండు రోజుల్లో ఎకరా, రెండెకరాలు ఉన్నటువంటి 36.30 లక్షల మంది రైతుల ఖాతాల్లో రూ.1,820.75 కోట్లు జమ చేసినట్లు వెల్లడించారు. రైతుబంధు లబ్ధిదారుల్లో ఐదెకరాలు, అంతకన్నా తక్కువ ఉన్నవారే అత్యధికంగా 92.50 శాతం మంది రైతులు ఉన్నారని పేర్కొన్నారు. విడతల వారీగా లబ్ధిదారులందరికీ రైతుబంధు జమ చేస్తామని నిరంజన్‌ రెడ్డి స్పష్టం చేశారు.