Indian Railway: రైల్వే రాయితీల పునరుద్ధరణ ఇప్పట్లో లేనట్టే..!

ఇంటర్నెట్‌ డెస్క్‌: రైల్వే ప్రయాణికులకు ఇప్పట్లో రాయితీలు లేనట్లే! టికెట్‌ ఛార్జీల విషయంలో ఆయా కేటగిరీల వారికి ఇస్తున్న రాయితీల పునరుద్ధరణ అంశమేదీ ప్రస్తుతం తమ వద్ద ప్రతిపాదనలో లేదని ఆ శాఖ మంత్రి అశ్విని వైష్ణవ్‌ స్పష్టం చేశారు. శుక్రవారం రాజ్యసభలో ఆయన ఈ మేరకు లిఖితపూర్వక సమాధానం ఇచ్చారు. రైల్వేలో 51 రకాల రాయితీలు ఉన్నాయి. కొవిడ్‌ వ్యాప్తి నేపథ్యంలో గతేడాది మార్చి 20 నుంచి దివ్యాంగులు, రోగులు, విద్యార్థులకు సంబంధించిన 15 కేటగిరీలు మినహా మిగతావాటికి ఇచ్చే రాయితీలు రద్దు చేసిన విషయం తెలిసిందే. మిగతా వాటిలో సీనియర్‌ సిటిజన్‌, కళాకారులు, క్రీడాకారులు, రైతులు, ఉపాధ్యాయులు.. ఇలా వివిధ వర్గాలున్నాయి.