Sunburn: ‘సన్‌బర్న్‌’ షోను అడ్డుకునేందుకు యత్నించిన ఎన్‌ఎస్‌యూఐ

శంషాబాద్‌: శంషాబాద్‌ విమానాశ్రయం జీఎమ్మార్‌ ఎరీనాలో శుక్రవారం రాత్రి భారీ బందోబస్తు మధ్య ‘సన్‌బర్న్‌’ సంగీత వేడుకలు ప్రారంభమయ్యాయి. ‘సన్‌బర్న్‌’ షోను అడ్డుకుంటామని మొదటి నుంచి ఎన్‌ఎస్‌యూఐ నాయకులు హెచ్చరించారు. దీంతో శంషాబాద్‌ జోన్‌ డీసీపీ ఆర్‌.జగదీశ్వర్‌రెడ్డి ఆధ్వర్యంలో హైదరాబాద్, సైబరాబాద్, రాచకొండ కమిషనరేట్లకు చెందిన పోలీసులు భారీ బందోబస్తును ఏర్పాటు చేశారు. నోవాటెల్ వెళ్లే రోడ్లన్నింటినీ పోలీసులు బ్లాక్ చేశారు. అయినప్పటికీ ఈ కార్యక్రమాన్ని అడ్డుకునేందుకు ఎన్‌ఎస్‌యూఐ కార్యకర్తలు అక్కడి భారీగా చేరుకున్నారు. అనంతరం ఈ షోలోకి దూసుకెళ్లేందుకు ప్రయత్నించారు. దీంతో పోలీసులు కొంత మంది ఎన్‌ఎస్‌యూఐ కార్యకర్తలను అరెస్ట్‌ చేశారు. ఈ సందర్భంగా ఎన్‌ఎస్‌యూఐ కార్యకర్తలు ‘సన్‌బర్న్‌’కు వ్యతిరేకంగా నినాదాలు చేశారు. అడ్డంకులు తొలగిపోవడంతో ‘సన్‌బర్న్‌’ షో వేడుకల నిర్వహకులు, పోలీసులు, ఔత్సాహికులు ఊపిరిపీల్చుకున్నారు. మరోవైపు ఈ వేడుకల్లో పాల్గొనడానికి మైనర్లు భారీగా తరలివచ్చినట్లు సమాచారం.