HYD: ప్రగతిభవన్‌ ముట్టడికి నర్సుల యత్నం

హైదరాబాద్‌: తెలంగాణ సీఎం క్యాంపు కార్యాలయం ప్రగతిభవన్‌ ముట్టడికి నర్సులు యత్నించారు. కరోనా సమయంలో తమని విధుల్లోకి తీసుకుని ఇప్పుడు నిర్దాక్షిణ్యంగా తొలగించారని ఆవేదన వ్యక్తం చేశారు. ఏడాదిన్నర పాటు కొవిడ్‌ సేవలు చేయించుకుని.. వైరస్‌ తీవ్రత తగ్గగానే బయటకు పంపడంపై ఆగ్రహం వ్యక్తం చేశారు.

రాష్ట్రవ్యాప్తంగా 1,640 మంది నర్సులను తొలగించారని వాపోయారు. కష్ట సమయంలో ప్రాణాలను సైతం లెక్క చేయకుండా కుటుంబాలకు దూరంగా ఉండి ప్రజలకు సేవ చేశామని తెలిపారు. ప్రభుత్వం తమకు న్యాయం చేయాలని డిమాండ్‌ చేశారు. ఆందోళన చేస్తున్న నర్సులను అరెస్టు చేసిన పోలీసులు స్టేషన్‌కు తరలించారు.