జూబ్లీహిల్స్‌ బ్యాంక్‌ సిబ్బంది నిర్వాకం.. 18 గంటలపాటు లాకర్‌ గదిలో 84 ఏళ్ల వృద్ధుడు!

జూబ్లీహిల్స్‌: బ్యాంక్‌ సిబ్బంది నిర్వాకం ఓ వృద్ధుడిని 18 గంటలపాటు బ్యాంక్‌ లాకర్‌ గదిలో ఉండేలా చేసింది. ఈ ఘటన హైదరాబాద్‌లోని జూబ్లీహిల్స్‌ యూనియన్‌ బ్యాంక్‌లో చోటుచేసుకుంది. వివరాల్లోకి వెళితే.. జూబ్లీహిల్స్‌ రోడ్‌ నంబర్‌ 67లో 84 ఏళ్ల వ్యాపారి కృష్ణారెడ్డి నివాసముంటున్నారు. ఆయన సోమవారం సాయంత్రం 4.20గంటలకు బ్యాంక్‌ లాకర్‌ పని మీద జూబ్లీహిల్స్‌ చెక్‌పోస్ట్‌లోని యూనియన్‌ బ్యాంక్‌కు వెళ్లారు. లాకర్‌ గది లోపల కృష్ణారెడ్డి ఉండగానే సిబ్బంది గమనించకుండా దాన్ని మూసివేయడంతో ఆయన రాత్రంతా అందులోనే గడపాల్సి వచ్చింది. 

ఎప్పటికీ కృష్ణారెడ్డి ఇంటికి రాకపోవడంతో ఆయన కుటుంబసభ్యులు పోలీసులకు ఫిర్యాదు చేశారు. ఈ క్రమంలో మంగళవారం ఉదయం పోలీసులకు అనుమానం వచ్చి సీసీ ఫుటేజీలను పరిశీలించగా బ్యాంక్‌ లాకర్‌ గదిలో కృష్ణారెడ్డి ఉన్నట్లు గుర్తించారు. వృద్ధుడికి మధుమేహం ఉండంతో ఆయన్ను వెంటనే ఆస్పత్రికి తరలించి చికిత్స అందిస్తున్నారు.