Hyderabad: హైదరాబాద్‌లో ‘వన్‌ వీక్‌.. వన్‌ ల్యాబ్‌’..ప్రారంభించిన కేంద్ర మంత్రి

హైదరాబాద్‌: వెదురు పరిశ్రమను సద్వినియోగం చేసుకోవాలని కేంద్రమంత్రి జితేందర్‌ సింగ్‌ అన్నారు. గతంలో వెదురు కోసం చైనా, కొరియా, జపాన్‌ మీద ఆధారపడేవాళ్లమని.. ఆయా దేశాలు పన్ను పెంచడంతో వెదురు పరిశ్రమను అభివృద్ధి చేస్తున్నామని చెప్పారు. ప్రస్తుతం ఆ వెదురను ఉపయోగించే అగరవత్తులు తయారు చేస్తున్నామని తెలిపారు. తార్నాక సీఎస్‌ఐఆర్‌, ఐఐసీటీ ఆడిటోరియంలో ఇవాళ్టి నుంచి ఈ నెల 12 వరకు నిర్వహించనున్న ‘వన్‌ వీక్‌ వన్‌ ల్యాబ్‌’ కార్యక్రమాన్ని కేంద్ర మంత్రి ప్రారంభించారు. 

ఈ సందర్భంగా ఆయన మాట్లాడుతూ.. ప్రధాని నరేంద్రమోదీ దార్శనికత వల్లే వెదురుపరిశ్రమ వృద్ధి చెందిందన్నారు. భారత్‌ అన్ని రంగాల్లో పురోగమిస్తుందన్న ఆయన.. మన ఆలోచన విధానం మారాల్సిన అవసరం ఉందన్నారు. అనంతరం భారత్‌ బయోటెక్‌ కో ఛైర్మన్‌, మేనేజింగ్‌ డైరెక్టర్‌ కృష్ణ ఎల్లా మాట్లాడుతూ.. సమాజ అవసరాల కోసం శాస్త్రవేత్తలు రిస్క్‌ తీసుకోవాలన్నారు. వ్యక్తిగత ప్రాజెక్టులే కాకుండా సమాజానికి ఉపయోగపడే ప్రాజెక్టులు చేయాలన్నారు. మరిన్ని కొత్త ప్రాజెక్టులు చేపట్టాల్సిన అవసరముందన్నారు.