ఆన్‌లైన్లో ఆర్డర్‌ చేశారా.. ఐతే ఇది చూడండి!

ఇంటర్నెట్‌ డెస్క్‌: కరోనా వైరస్‌ బారిన పడకుండా ఉండేందుకు ప్రజలు తమ అలవాట్లు, జీవన విధానం అన్నిటినీ మార్చుకుంటున్నారు. ఇదివరకు గంటలు గంటలు షాపింగ్‌ చేసే వారుకూడా.. తమ అవసరాలకు ఆన్‌లైన్‌ డెలివరీని ఆశ్రయిస్తున్నారు. అయితే ఇందులో దాగి ఉన్న మరో విధమైన ప్రమాదానికి సంబంధించిన వీడియో ఒకటి నెట్టింట్లో చక్కర్లు కొడుతోంది.

దీనిలో డెలివరీ ఇచ్చేందుకు వచ్చిన ఓ మహిళ.. సదరు వస్తువును వినియోగదారుకు అందచేసినందుకు రుజువుగా దానిని ఇంటి ముందు భాగంలో కిందపెట్టి తన ఫోన్‌లో ఓ చిత్రాన్ని తీసుకుంది. అనంతరం దానిని తానే తీసుకుని నెమ్మదిగా అక్కడి నుంచి జారుకుంది. కాగా అక్కడ ఉన్న సీసీ టీవీ కెమేరాలో ఈ సంఘటన అంతా నమోదయింది. ఇది సామాజిక మాధ్యమాల్లో షేర్‌ కావటంతో దీనిని చూసిన వారు.. ‘‘సీసీ టీవీ కెమేరాలు అంటూ ఒకటి ఉంటాయని నీకు తెలియదా.. నీ ఉద్యోగం ఊడింది.. ఇదేం బాలేదు.. సరిగ్గా టిప్‌ ఇచ్చి ఉంటే ఇలా జరిగేది కాదు..’’ అంటూ రకరకాలుగా స్పందిస్తున్నారు. మరి ఆ సంగతేంటో మీరూ చూసేయండి మరి!