AIDS: పదేళ్లలో 17లక్షల మందికి హెచ్‌ఐవీ.. మొదటి స్థానంలో ఆంధ్రప్రదేశ్‌

దిల్లీ: అరక్షిత లైంగిక సంపర్కం కారణంగా దేశంలో పదేళ్ల కాలంలో 17 లక్షల మందికిపైగా ఎయిడ్స్‌​ మహమ్మారి బారినపడ్డారు. 2011-21 మధ్య 17,08,777 మందికి హెచ్​ఐవీ సోకినట్లు జాతీయ ఎయిడ్స్​ నియంత్రణ సంస్థ(NACO) వెల్లడించింది. మధ్యప్రదేశ్​కు చెందిన సామాజిక కార్యకర్త చంద్రశేఖర్​ గౌర్​ సమాచార హక్కు చట్టం (RTI) కింద చేసిన అభ్యర్థన మేరకు ఎన్‌ఏసీఓ ఈ వివరాలు వెల్లడించింది. అయితే.. ఎయిడ్స్ బారినపడుతున్న వారి సంఖ్య దశాబ్దకాలంగా క్రమంగా తగ్గుతూ వస్తున్నట్లు ఎన్‌ఏసీఓ స్పష్టం చేసింది. అరక్షిత సంభోగం కారణంగా 2011-12లో 2.4లక్షల మందికి హెచ్​ఐవీ సోకగా.. 2020-21లో ఆ సంఖ్య 85,268గా ఉన్నట్లు తెలిపింది.

అయితే ఎయిడ్స్‌ సోకుతున్నవారిలో తెలుగు రాష్ట్రం ఆంధ్రప్రదేశ్‌ మొదటి స్థానంలో ఉండటం గమనార్హం. ఆంధ్రప్రదేశ్‌లో గత పదేళ్ల కాలంలో 3,18,814 మందికి హెచ్​ఐవీ సోకింది. 2,84,577 కేసులతో మహారాష్ట్ర, 2,12,982 కేసులతో కర్ణాటక రెండు, మూడు స్థానాల్లో ఉన్నాయి. తమిళనాడు (1,16,536), ఉత్తర్​ప్రదేశ్ ​(1,10,911), గుజరాత్​(87,440) ఆ తర్వాతి స్థానాల్లో నిలిచాయి. రక్త మార్పిడి, ఇతర సంబంధిత కారణాలతో దేశంలో పదేళ్లలో 15,782 మంది హెచ్​ఐవీ బారిన పడ్డారు. 4,423 మంది చిన్నారులకు తల్లుల నుంచి ఎయిడ్స్‌ సోకింది. 2020 నాటికి దేశంలో 23,18,737 మంది హెచ్​ఐవీతో జీవిస్తున్నారు. వీరిలో 81,430 మంది చిన్నారులున్నారు.

దేశంలో హెచ్​ఐవీ కేసులు స్థిరంగా తగ్గుతున్నాయి. భారత్​లో పరిస్థితులు క్రమంగా మెరుగుపడుతున్నాయని నిపుణులు పేర్కొంటున్నారు. గురుగ్రామ్​లోని ఫోర్టిస్ మెమోరియల్​ రీసెర్చ్‌ ఇన్‌స్టిట్యూట్‌లోని ఇంటర్నల్ మెడిసిన్ విభాగం డైరెక్టర్‌ సతీశ్​ కౌల్ మాట్లాడుతూ.. టెస్టులు, నిర్ధరణ మొదలు చికిత్స వరకు హెచ్​ఐవీ రోగుల పర్యవేక్షణ విషయంలో భారత ప్రభుత్వ సంస్థ ఎన్‌ఏసీఓ సమర్థంగా పనిచేస్తోందన్నారు. హైలీ యాక్టివ్ యాంటీ రెట్రోవైరల్ ట్రీట్‌మెంట్ (HAART) పరీక్షలు అందుబాటులో ఉండటంతో హెచ్‌ఐవీ రోగనిర్ధారణ మెరుగుపడిందని తెలిపారు. చికిత్స సులువుగా లభించడం కారణంగా దేశంలో ఎయిడ్స్​ రోగుల పరిస్థితి మెరుగైనట్లు పేర్కొన్నారు. 2000 తర్వాత నుంచి దేశంలో హెచ్​ఐవీ సోకిన రోగుల సంఖ్య తగ్గుతోందన్నారు.

దిల్లీ ద్వారకాలోని ఆకాశ్​ హెల్త్​కేర్​ ఆస్పత్రిలో ఇంటర్నల్ మెడిసిన్ విభాగం సీనియర్ కన్సల్టెంట్ ప్రభాత్ రంజన్​ సిన్హా మాట్లాడుతూ.. ‘రెండేళ్లుగా హెచ్​ఐవీ కేసుల సంఖ్య చాలా తక్కువగా ఉంది. కరోనా మహమ్మారి, లాక్​డౌన్​ ఆంక్షలు కూడా ఇందుకు కారణం. ఇప్పుడు కొవిడ్ తగ్గిపోతోంది కాబట్టి ఎయిడ్స్ రోగుల సంఖ్య పెరిగే అవకాశముంది. ఎవరికైనా హెచ్​ఐవీ సోకినట్లు తేలితే.. సాధ్యమైనంత త్వరగా వారు యాంటీ రెట్రోవైరల్ థెరపీ చేయించుకోవాలి’ అని పేర్కొన్నారు.