Medaram 2022: మేడారం చేరుకున్న సారలమ్మ, పగిడిద్దరాజు, గోవిందరాజులు

మేడారం: తెలంగాణ కొంగు బంగారంగా భావించే మేడారం సమ్మక్క-సారక్క మహాజాతరలో కీలక ఘట్టం ఆవిష్కృతమైంది. మహాజాతరలో మొదటి రోజైన ఇవాళ సమ్మక్క భర్త పగిడిద్దరాజు, సారలమ్మ, గోవిందరాజులు మేడారం చేరుకున్నారు. మహబూబాబాద్‌ జిల్లా గంగారం మండలం పూనుగొండ్ల నుంచి డోలు వాయిద్యాలు, శివసత్తుల నృత్యాల నడుమ సమ్మక్క భర్త పగిడిద్దరాజును తీసుకొని నిన్న పాదయాత్రగా పూజారులు మేడారానికి బయలుదేరారు. 24 గంటలపాటు పాదయాత్ర సాగిన తర్వాత బుధవారం సాయంత్రం పగిడిద్దరాజు మేడారం చేరుకున్నారు. అలాగే కన్నెపల్లి నుంచి సారలమ్మను, ఏటూరునాగారం మండలం కన్నాయిగూడెం నుంచి గోవిందరాజులును మేడారం తీసుకొచ్చారు. మేడారంలోని సమ్మక్క-సారలమ్మ ఆలయంలో ఆదివాసీ సంప్రదాయ పద్ధతులను అనుసరిస్తూ ప్రత్యేక పూజలు నిర్వహించారు. అనంతరం మేడారం గద్దెలపై సారలమ్మ, పగిడిద్దరాజు, గోవిందరాజులును గద్దెలపై కొలువుదీర్చారు. దీంతో మేడారం మహాజాతర అట్టహాసంగా ప్రారంభమైంది.

మేడారం జాతర అంగరంగ వైభవంగా సాగుతోంది. అమ్మవార్లు గద్దెల వద్దకు చేరుకునే కీలక ఘట్టాన్ని వీక్షించేందుకే వేలాది మంది భక్తులు తరలివచ్చారు. దీంతో మేడారం పరిసరాలు భక్తజన సంద్రంగా మారాయి. వివిధ ప్రాంతాల నుంచి వచ్చిన భక్తులు అమ్మవార్లకు నిలువెత్తు బెల్లాన్ని(బంగారం) కానుకగా సమర్పిస్తున్నారు. అమ్మవార్లకు బెల్లం, చీరెసారెలు, ఓడిబియ్యం సమర్పించి మొక్కులు చెల్లించుకుంటున్నారు. మహాజారతలో రెండో రోజున చిలుకల గుట్టలో భరిణె రూపంలో ఉన్న సమ్మక్కను గద్దెపై ప్రతిష్ఠిస్తారు. మూడో రోజున అమ్మవార్లు ఇద్దరూ దర్శనమిస్తారు. నాలుగో రోజు సాయంత్రం వారిని యథాస్థానానికి తీసుకెళతారు.