Tirumala: తిరుమలలో ఘనంగా పార్వేట ఉత్సవం

తిరుమల: కలియుగ దైవం వేంకటేశ్వరస్వామి పార్వేట ఉత్సవం సోమవారం ఘనంగా జరిగింది. ఒక తిరుచ్చిలో శ్రీమలయప్ప స్వామి, మరో తిరుచ్చిలో శ్రీకృష్ణ స్వామి వేంచేయగా.. పార్వేట మండపంలో పుణ్యాహము, ఆరాధన, నివేదన హారతులిచ్చారు. అనంతరం శ్రీ కృష్టస్వామివారిని సన్నిధి యాద‌వ పూజ చేసిన చోటుకు తీసుకెళ్లి పాలు, వెన్న, హారతులు సమర్పించారు. ఆ తర్వాత శ్రీ మలయప్పస్వామివారు కొంత దూరము పరుగెత్తగా.. ఆయన తరపున అర్చకులు బాణమువేసిన తర్వాత వెనక్కి వచ్చారు. ఇలా మూడుసార్లు చేశారు. ఉత్సవం పూర్తయిన తర్వాత శ్రీ మలయప్ప స్వామివారు మహాద్వారమునకు వచ్చి హతీరాంజీవారి బెత్తమును తీసుకొని సన్నిధిలోనికి వెళ్లారు. ఇంతటితో పార్వేట ఉత్సవం ముగిసింది. ఈ ఉత్సవంలో జెఈఓ వీరబ్రహ్మం, ఎస్ ఇ-2 జగదీశ్వర్ రెడ్డి, ఈఈ జగన్మోహన్ రెడ్డి, డిఇ రవి శంకర్ రెడ్డి, ఆరోగ్యశాఖ అధికారిని డాక్టర్ శ్రీదేవి డిప్యూటీ ఈవో హరింద్రనాథ్, వీజివోలు బాలిరెడ్డి, గిరిధర్, ఇతర ఉన్నతాధికారులు, విశేష సంఖ్యలో భక్తులు పాల్గొన్నారు.