AP News: సోమశిల డ్యామ్‌ తెగిందన్న వదంతులతో జనం పరుగులు..!

నెల్లూరు: సోమశిల డ్యామ్‌ తెగిపోయిందన్న వదంతులతో నెల్లూరు జిల్లాలోని పెన్నా పరీవాహక ప్రాంత ప్రజలు భయాందోళనకు గురయ్యారు. కోవూరు మండలంలో సాలుచింతల, స్టాబిడి కాలనీ ప్రాంతవాసులు చేతికందిన సామగ్రి తీసుకొని పరుగులు పెట్టారు. వరదల కారణంగా సర్వం కోల్పోయిన ప్రజలు.. సోమశిల జలాశయం తెగిందన్న వదంతులతో మరింత కంగారు పడ్డారు. వృద్ధులు, పిల్లలను తీసుకొని వీధులవెంట పరుగులు తీయడంతో ఏం జరుగుతుందో అర్థం కాని పరిస్థితి నెలకొంది. అధికారులు వచ్చి వారికి నచ్చజెప్పాల్సిన పరిస్థితి తలెత్తింది. సోమశిల జలాశయానికి ఎలాంటి ముప్పూ లేదని జిల్లా జాయింట్‌ కలెక్టర్‌ హరేంద్ర ప్రసాద్‌ అధికారికంగా వెల్లడించారు. తప్పుడు ప్రచారం చేసి ప్రజలను ఆందోళనకు గురిచేసిన వారిపై చర్యలు తీసుకుంటామని అధికారులు వెల్లడించారు. అయితే వరదల సమయంలో సమాచారం ఇవ్వనందుకు అధికారులపై ప్రజలు ఆగ్రహం వ్యక్తం చేశారు.