Railway Projects: ఆరు రైల్వే ప్రాజెక్టులకు ఏపీ సర్కార్ వాటా ఇవ్వాలి: అశ్వనీ వైష్ణవ్

దిల్లీ: రూ.15 వేల కోట్ల రూపాయలతో చేపట్టిన ఆరు ప్రధానమైన రైల్వే ప్రాజెక్టులకు ఆంధ్రప్రదేశ్ సర్కార్ తన వంతు వాటా సమకూర్చాల్సి ఉందని రైల్వేశాఖ రాజ్యసభలో తెలియజేసింది. తెలుగుదేశం సభ్యుడు కనకమేడల రవీంద్రకుమార్ అడిగిన ప్రశ్నకు రైల్వే శాఖ మంత్రి అశ్వనీ వైష్ణవ్ ఈ మేరకు సమాధానం ఇచ్చారు. ఏపీలో 15,846.35 కోట్లతో చేపట్టిన 6 ప్రాజైక్టులకు ఆంధ్రప్రదేశ్ సర్కారు రూ.486.63 కోట్లు ఇచ్చిందన్నారు. ఇంకా ఐదు ప్రాజెక్టులకు సంబంధించి రూ.5 వేల కోట్లు సమకూర్చాల్సి ఉందన్నారు. రూ.2,155 కోట్లతో చేపట్టిన భద్రాచలం-కొవ్వూరు లైన్‌లో 50 శాతం వాటా భరించడానికి ఏపీ ప్రభుత్వం అంగీకారం తెలపాల్సి ఉందన్నారు. 2,643 కోట్లతో చేపట్టిన నడికుడి-శ్రీకాళహస్తి కొత్తలైన్  కోసం ఉచితంగా భూమి సహా 50 శాతం ఖర్చును ఏపీ సర్కార్ సమకూర్చాల్సి ఉందన్నారు. ఆ మార్గానికి ఇప్పటివరకు రూ.6 కోట్లు మాత్రమే ఇచ్చినట్లు మంత్రి తెలిపారు.