Republic Day: ప్రగతిభవన్‌లో రిపబ్లిక్‌ డే వేడుకలు.. త్రివర్ణ పతాకాన్ని ఎగురవేసిన సీఎం కేసీఆర్‌

హైదరాబాద్‌: 74వ గణతంత్ర దినోత్సవాన్ని పురస్కరించుకుని తెలంగాణ సీఎం కేసీఆర్‌ జాతీయ పతాకాన్ని ఆవిష్కరించారు. ప్రగతిభవన్‌లో నిర్వహించిన రిపబ్లిక్‌ డే వేడుకల్లో సీఎంతో పాటు పలువురు మంత్రులు, సీఎస్‌, డీజీపీ, ఎమ్మెల్యేలు, ఎమ్మెల్సీలు పాల్గొన్నారు. వేడుకల సందర్భంగా జాతిపిత మహాత్మాగాంధీ, రాజ్యాంగ నిర్మాత డా బీఆర్‌ అంబేడ్కర్‌ చిత్రపటాలకు కేసీఆర్ పూలమాలలు వేసి నివాళులర్పించారు. ఈ సందర్భంగా దేశానికి వారు చేసిన సేవలను సీఎం గుర్తుచేసుకున్నారు.

అంతకుముందు సికింద్రాబాద్‌ పరేడ్‌ మైదానంలోని అమర జవానుల స్తూపం వద్ద కేసీఆర్‌ నివాళులర్పించారు. ప్రగతిభవన్‌లో నిర్వహించిన వేడుకల్లో మంత్రులు ప్రశాంత్‌రెడ్డి, సత్యవతి రాథోడ్‌, మల్లారెడ్డి, మాజీ స్పీకర్‌ మధుసూదనాచారి, ఎమ్మెల్సీలు పల్లా రాజేశ్వర్‌రెడ్డి, నవీన్‌రావు, శంభీపూర్‌ రాజు, వివిధ శాఖల ఉన్నతాధికారులు పాల్గొన్నారు.