SC Railway: విజయవాడ రైల్వే స్టేషన్‌లో అందుబాటులోకి అత్యాధునిక రోబోటిక్‌ మసాజ్‌ ఛైర్లు!

విజయవాడ: ప్రయాణికుల సౌకర్యార్థం విజయవాడ రైల్వే స్టేషన్‌లో దక్షిణమధ్య రైల్వే రోబోటిక్‌ మసాజ్‌ సేవలను అందుబాటులోకి తీసుకొచ్చింది. ఈ రోబోటిక్‌ మసాజ్‌ సెంటర్‌ను దక్షిణమధ్య రైల్వే డివిజినల్‌ మేనేజర్‌ శివేంద్ర మోహన్‌ సోమవారం ప్రారంభించారు. దీని ద్వారా ప్రయాణికులు బాడీ, ఫుట్‌ మసాజ్‌ సేవలను పొందవచ్చు. విజయవాడ రైల్వే స్టేషన్‌లో ఒకటో నంబర్‌ ఫ్లాట్‌ఫామ్‌పై 84 చదరపు అడుగుల విస్తీర్ణంలో ఈ మసాజ్‌ సెంటర్‌ను ఏర్పాటు చేశారు. ఇందులో రెండు రోబోటిక్‌ బాడీ మసాజ్‌ కుర్చీలు, ఒక ఫుట్‌ మసాజ్‌ కుర్చీ ప్రయాణికులకు అందుబాటులో ఉంచారు. 

టికెట్‌యేతర ఆదాయాన్ని పెంచుకోవడంలో భాగంగా ఈ మసాజ్‌ సెంటర్‌ను ఏర్పాటు చేసినట్లు ఐఆర్‌టీఎస్‌ సీనియర్ డీసీఎమ్‌ వి. రాంబాబు తెలిపారు. రోజులో ఎంతో మంది ప్రయాణికులు రైళ్ల కోసం ఫ్లాట్‌ఫామ్‌పైవేచి చూస్తుంటారు. ఆ సమయంలో ప్రయాణికులు బాడీ మసాజ్‌కు ₹ 60, ఫుట్‌ మసాజ్‌కు ₹ 30 రుసుం చెల్లించి రోబోటిక్‌ మసాజ్‌ సేవలను ఉపయోగించుకోవచ్చుని తెలిపారు. ప్రయాణికులకు మెరుగైన సేవలతోపాటు, సౌకర్యవంతమైన ప్రయాణ అనుభూతిని అందిచడం కోసం విజయవాడ రైల్వే డిజిజన్‌ నిరంతరం కృషి చేస్తోందని రాంబాబు తెలిపారు. ఇటీవలే స్టేషన్‌లో ఫిష్‌ స్పా, హ్యాండ్‌లూమ్స్‌ అండ్‌ క్రాఫ్ట్స్‌, మొబైల్‌ యాక్ససరీలకు సంబంధించిన అవుట్‌లెట్లను ప్రారంభించినట్లు చెప్పారు. ఈ కార్యక్రమంలోడీసీఎమ్‌ పి. కిరణ్‌ కుమార్‌, ఏసీఎమ్‌ పీ.బీ.ఎన్‌ ప్రసాద్‌ (ఏసీఎమ్‌), ఇతర సిబ్బంది పాల్గొన్నారు.