వామ్మో! 3 బల్బులు.. రూ.25 వేలు కరెంటు బిల్లు

చెన్నై:  సాధారణంగా కరెంటుబిల్లు మనం వాడుకున్న దానికి తగ్గట్టు వస్తుంది. యూనిట్ల ఆధారంగా చార్జీ వేస్తారు. కానీ, తమిళనాడులోని ఓ వృద్ధురాలికి మాత్రం 3 బల్బులు వాడుకుంటే ఏకంగా రూ.25వేల కరెంట్ బిల్‌ వచ్చింది. ఆమెకే కాదు ఆ ప్రాంతంలో నివసించే అందరికీ వాడుకున్న దాని కంటే ఎక్కువగానే బిల్లు వచ్చింది. వివరాల్లోకి వెళితే.. తమిళనాడులోని నీల్‌గిరిస్‌ జిల్లా మఠమగళం ప్రాంతంలో  దేవకి అనే వృద్ధురాలు చిన్న ఇంట్లో నివాసం ఉంటున్నారు. కేవలం మూడు బల్బులు మాత్రమే వాడే ఆమెకు ఈ నెల కరెంటు బిల్లు రూ.25వేలు కట్టాలంటూ మెస్సేజ్ వచ్చింది. దీంతో కంగుతిని ఎలక్ట్రిసిటీ బోర్డును సంప్రదించింది. వారు స్పందించలేదు. అయితే అదే ప్రాంతం నుంచి ఈ తరహా ఫిర్యాదులు ఎక్కువగా రావడంతో శాఖపరమైన విచారణ చేశారు. అప్పుడు అసలు విషయం తెలిసి అధికారులు నివ్వెరపోయారు. ఆ ప్రాంతంలో రీడింగ్‌ తీసే ఉద్యోగి రమేశ్‌ నకిలీ రీడింగ్‌లు తీసి నిర్వాసితులు చెల్లిస్తున్న అదనపు డబ్బును తన ఖాతాలో పడేలా ఏర్పాట్లు చేసుకున్నాడు. అతనిని సస్పెండ్‌ చేసిన అధికారులు పూర్తి విచారణ చేపట్టారు.