military operations: శునకాలకు పారాచూట్‌ శిక్షణ

మాస్కో: యుద్ధ విమానాలు వెళ్లలేని ప్రాంతాలకు శునకాలను పంపించాలని రష్యా ప్రభుత్వం నిర్ణయించింది. ఇందులో భాగంగానే మిలిటరీ విధులు నిర్వహించే శునకాలకు పారాచూట్‌ శిక్షణ అందిస్తోంది. ఈ శిక్షణ తుది దశకు చేరుకుంది. టెక్నోడినామికా అనే ఏవియేషన్‌ హోల్డింగ్‌ సంస్థ ఈ శిక్షణనివ్వడంలో భాగస్వామి అయ్యింది. ఈ సందర్భంగా ఆ సంస్థ ఓ ప్రకటన విడుదల చేసింది. యుద్ధ విమానం ల్యాండ్‌ చేయలేని ప్రదేశాల్లో.. సైనిక కార్యకలాపాలు నిర్వహించేందుకు ఓ సైనికుడితోపాటు అధికారిక శునకాన్ని పారాచూట్‌ సాయంతో కిందకు పంపించేందకు జరుగుతున్న సన్నాహాలు తుది దశకు చేరుకున్నట్లు వెల్లడించింది. శునకాలకు పారాచూట్‌ శిక్షణ ఇస్తున్న ఓ వీడియోను యూట్యూబ్‌తోపాటు ఇన్‌స్టాగ్రామ్‌లో పంచుకుంది. హెలికాప్టర్‌ గాల్లో ఎగురుతుండగా.. శునకాలను పొట్ట భాగానికి కట్టుకొని సైనికులు పారాచూట్‌ సాయంతో కిందికు దిగుతున్న దృశ్యాలు అందులో కినిపిస్తున్నారు. ఈ శిక్షణకు సంబంధించిన పలు వివరాలను అధికారులు ఆ వీడియోలో వివరించారు.