AP PRC: అంతా అయ్యాక అలా మాట్లాడటం సరికాదు : సజ్జల

విజయవాడ: ఆర్థిక పరిస్థితి వల్ల ఫిట్‌మెంట్‌ ఎక్కువ ఇవ్వలేకపోయామని ఏపీ ప్రభుత్వ సలహాదారు సజ్జల రామకృష్ణారెడ్డి తెలిపారు. నిన్నే చెబితే ఉపాధ్యాయ సంఘాల సమస్యలు పరిష్కరించే వాళ్లమన్నారు. హెచ్‌ఆర్‌ఏ వల్ల టీచర్లకు అన్యాయం జరిగిందని చెబితే సరిచేశామని, మినిట్స్‌ తయారయ్యాక బయటకు వెళ్లి మాట్లాడటం సరికాదని చెప్పారు. విజయవాడలో ఆయన మీడియాతో మాట్లాడుతూ.. ప్రభుత్వ పరిస్థితిని ఉద్యోగులు సహృదయంతో అర్థం చేసుకోవాలన్నారు. ఎవరూ అడగకపోయినా ఉద్యోగ విరమణ వయస్సును 62కు పెంచినట్లు సజ్జల గుర్తు చేశారు. మిగిలిన సమస్యలను కూడా పరిష్కరిస్తామని సీఎం హామీ ఇచ్చినట్లు తెలిపారు. ‘చలో విజయవాడ’లోనూ ప్రభుత్వం ఉద్యోగులను ఏమీ అనలేదని, పవన్‌ అన్నట్లు ప్రభుత్వం ఎక్కడా ఆధిపత్య ధోరణి చూపలేదని చెప్పారు.