KCR: పూరీ తీరంలో కేసీఆర్‌ సైకత శిల్పం

భువనేశ్వర్‌: తెలంగాణ ముఖ్యమంత్రి కేసీఆర్‌ ప్రారంభించనున్న జాతీయ పార్టీని ఆహ్వానిస్తూ.. ఆయన సైకత శిల్పాన్ని పూరీ తీరంలో ఏర్పాటు చేశారు. తెరాస నేత అలిశెట్టి అర్వింద్‌ ఆధ్వర్యంలో సైకత శిల్పి సాహు దీనిని రూపొందించారు. 14 ఏళ్ల పాటు అలుపెరుగని పోరాటంతో తెలంగాణ సాధించిన ముఖ్యమంత్రి కేసీఆర్.. తెలంగాణ రాష్ట్రాన్ని దేశానికే మార్గదర్శిగా తీర్చిదిద్దారని అర్వింద్‌ అన్నారు. అదే తరహాలో దేశ భవిష్యత్తును సైతం మార్చగల సత్తా ఆయనకు ఉందని కొనియాడారు.

దేశానికి స్వాతంత్ర్యం వచ్చి 75 ఏళ్లు పూర్తయినా.. ఇప్పటికీ రైతులు, ఇతర వర్గాలు సమస్యలతో కొట్టిమిట్టాడుతున్నారంటే అది భాజపా, కాంగ్రెస్‌ల పాలన వైఫల్యమేనని గుర్తించిన కేసీఆర్‌.. జాతీయ పార్టీ ఏర్పాటుకు సిద్ధమయ్యారని అర్వింద్‌ తెలిపారు. యావత్ దేశం తెలంగాణ వైపు చూస్తున్న వేళ దేశ గతిని సైతం మార్చేందుకు నడుం బిగించిన తమ నాయకుడికి వినూత్న రీతిలో ఆహ్వానం పలికేందుకే సైకత శిల్పాన్ని ఏర్పాటు చేయించినట్లు చెప్పారు. అద్భుతంగా తీర్చిదిన శిల్పాన్ని వీక్షించేందుకు పూరీలోని స్థానికులు పర్యాటకులు ఆసక్తి కనబరిచారు.