రేషన్‌ వాహనాలను పరిశీలించిన ఎస్‌ఈసీ

అమరావతి : ఆంధ్రప్రదేశ్‌లో రేషన్‌ డెలివరీ వాహనాలను బుధవారం ఉదయం ఎస్‌ఈసీ రమేశ్‌ కుమార్‌ తనిఖీ చేశారు. హైకోర్టు ఉత్తర్వుల మేరకు విజయవాడ ఎస్‌ఈసీ కార్యాలయానికి ఈ వాహనాలను పౌర సరఫరాల శాఖ అధికారులు తీసుకొచ్చారు. వాహనాలపై ఉన్న రంగులను, ఫొటోలను ఎస్‌ఈసీ పరిశీలించారు. వాహనంలోని సదుపాయాలను అధికారులు ఎస్‌ఈసీకి వివరించారు.

పంచాయతీ ఎన్నికల నేపథ్యంలో ఇంటింటికీ రేషన్‌ అందించే వాహనాలపై రాజకీయ నేతల ఫొటోలు, పార్టీ గుర్తులు ఉండరాదని హైకోర్టు ఆదేశాలు జారీ చేసిన విషయం తెలిసిందే. ఏపీ ప్రభుత్వం గతంలో ఫిబ్రవరి ఒకటో తేదీ నుంచి ఇంటింటికీ రేషన్‌ పంపిణీ చేయాలని నిర్ణయించింది. ఎన్నికల కోడ్‌ అమలులో ఉన్నందున పంపిణీకి అనుమతి కోరుతూ ప్రభుత్వం హైకోర్టులో హౌస్‌ మోషన్‌ పిటిషన్‌ దాఖలు చేసింది. దీనిపై హైకోర్టు విచారణ చేపట్టింది. ఎన్నికల నిబంధనలకు లోబడే రేషన్‌ వాహనాల ద్వారా పంపిణీ కార్యక్రమం చేపట్టాలని హైకోర్టు ప్రభుత్వానికి సూచించింది. కార్యక్రమ వివరాలతో ఎస్‌ఈసీని సంప్రదించాలని తెలిపింది.

ఇవీ చదవండి..
రేషన్‌ వాహనాలపై పార్టీ గుర్తులు వద్దు:హైకోర్టు

107 పల్లెలకు ఇవే చివరి పంచాయతీ ఎన్నికలా..?