Kakinada: పులిని బంధించే చర్యలు వేగవంతం.. రంగంలోకి విశాఖ జూ అధికారులు

ప్రత్తిపాడు: కాకినాడ జిల్లా ప్రత్తిపాడు మండలంలో పులిని బంధించే చర్యలను అటవీశాఖ వేగవంతం చేసింది. డీఎఫ్‌వో ఐకేవీ రాజు ఆధ్వర్యంలో 150 మంది సిబ్బంది పులిని బంధించేందుకు గస్తీ కాస్తున్నారు. నిన్న పులి మరోసారి సంచరించినట్లు సీసీ కెమెరాల్లో నమోదైంది. పోతులూరు సమీపంలో 80 అడుగుల గుట్టపై దాన్ని గుర్తించారు.

పులిని బంధించేందుకు మూడు బోన్లను సిద్ధంగా ఉంచారు. సరుగుడు పొలాల నుంచి బోన్లు తరలించేందుకు మరికొంత సమయం పడుతుందని అధికారులు తెలిపారు. పులిని పట్టుకునే ఆపరేషన్‌లో విశాఖ జూ అధికారులు పాల్గొంటున్నారు. పులి జాడ కోసం 40 చోట్ల సీసీ కెమెరాలు ఏర్పాటు చేశారు. పులి కనిపించిందంటూ అక్కడక్కడా వినిపిస్తున్న వదంతులను నమ్మొదంటూ స్థానిక ప్రజలకు అధికారులు సూచించారు.