Bhadrachalam: వైభవంగా భద్రాద్రి రామయ్య పట్టాభిషేకం

భద్రాచలం: భద్రాచలంలోని శ్రీ సీతారామచంద్ర స్వామివారికి శుక్రవారం పుష్కర సామ్రాజ్య పట్టాభిషేకం వైభవంగా నిర్వహించారు. తొలుత ప్రధానాలయంలో స్వామివారిని కల్పవృక్షవాహనంపై వూరేగింపు నిర్వహించారు. అనంతరం సామూహిక పారాయణం, హోమాలు చేశారు. రాములవారిని మిథిలా మండపానికి చేర్చే సమయంలో ‘జైశ్రీరామ్‌’ అంటూ భక్తులు నీరాజనాలు పలికారు. ఈ సందర్భంగా పట్టాభిషేక మహోత్సవం గురించి అర్చకులు చేసిన ప్రవచనం అలరించింది. ఇటీవల దేశంలో నలు వైపులా ఉన్న పుణ్య నదులు నుంచి వైదిక సిబ్బంది సేకరించిన పుష్కర తీర్థాలను పట్టాభిషేకానికి తీసుకొచ్చారు. తొలుత మిథిలా మండపం వద్ద ఉంచి వాటికి ఆవాహన పూజలు చేశారు. ఈ నదీ జలాల విశిష్టతను వేద పండితులు వివరించారు. వేడుకను వీక్షించిన భక్తులందరికీ సకల శుభాలు కలగాలని ఆశీస్సులు అందించారు.

రామయ్యకు గవర్నర్‌ ప్రత్యేక పూజలు

శ్రీరామ పట్టాభిషేక ఉత్సవాలను తిలకించేందుకు గవర్నర్‌ తమిళిసై భద్రాచలం వచ్చారు. ప్రధానాలయంలో స్వామివారికి పూజలు నిర్వహించారు. అంతకుముందు ఆలయం వద్దకు చేరుకున్న గవర్నర్‌కు ఈవో రమాదేవి సాదర స్వాగతం పలికారు. ఆలయ అర్చకులు ఆశీర్వదించి తీర్థ ప్రసాదాలను అందజేశారు. ప్రధానాలయంతోపాటు అనుబంధంగా ఉన్న ఆంజనేయస్వామి, లక్ష్మీతాయారమ్మలను గవర్నర్‌ దర్శించుకున్నారు. అనంతరం పట్టాభిషేకం నిర్వహిస్తున్న మిథిలా మండపానికి చేరుకుని ఈ క్రతువును వీక్షించారు. ఈ వేడుకల్లో త్రిదండి దేవనాథ జీయర్‌ స్వామి, జిల్లా కలెక్టర్‌ అనుదీప్‌, గిరిజన శాఖ మంత్రి సత్యవతి రాథోడ్‌, అదనపు కలెక్టర్‌ వెంకటేశ్వర్లు, ఎస్పీ వినీత్‌, ఏఎస్పీ పరితోష్‌, ఐటీడీఏ పీవో గౌతమ్‌, ఆర్డీవో రత్నకల్యాణి తదితరులు పాల్గొన్నారు.