Hair fall:జుట్టు రాలుతోందా! అయితే ఇలా చేయండి!

ఇంటర్నెట్‌ డెస్క్‌: మహిళలు, పురుషులు... చిన్నా పెద్దా అనే తేడా లేకుండా ప్రతి ఒక్కరినీ బాధిస్తున్న సమస్య జుట్టు రాలడం. ఈ సమస్యను అధిగమించేందుకు మార్కెట్‌లో దొరికే వివిధ రకాల క్రీమ్‌లను, షాంపూలు, నూనెలను వాడుతుంటారు. కానీ ఫలితం శూన్యం. అయితే, కొన్ని పద్ధతులు, జాగ్రత్తల ద్వారా జుట్టు రాలే సమస్యను తగ్గించవచ్చు.

బిగుతుగా వద్దు: కొంతమంది బిగుతుగా జడ వేసుకుంటారు. ఇది మంచి పద్ధతి కాదు. ఇలా చేయడం ద్వారా వెంట్రుకలు మరింత ఎక్కువ రాపిడికి గురై నిర్జీవంగా మారతాయి. పొనీటెల్‌ వేసుకొన్నా.. జడ వేసుకొన్నా కాస్త వదులుగా వేసుకోవాలి.

సిల్క్‌ కవరే ఉత్తమం: పడుకునేటప్పుడు తప్పనిసరిగా దిండుకు(తలగడ) సిల్క్‌ కవర్‌ను వాడడం ఉత్తమం. దీని వల్ల నిద్రపోతున్నపుడు వెంట్రుకలకు రాపిడి తక్కువగా ఉంటుంది. జుట్టు ఊడకుండా ఉండేందుకు ఇది సహాయపడుతుంది. 

మీకు నప్పుతుందా లేదా: కొంతమంది రకరకాల కండీషనర్లు వాడుతారు. తరచూ కండీషనర్ల బ్రాండులను మారిస్తే జుట్టుపై ప్రభావం చూపిస్తుంది. అందుకే కండీషనర్లను మీకు నప్పుతాయా లేదా అని తెలుసుకున్నాకే వాడటం మంచిది.

ప్రయోగాలు వద్దు: ఈ మధ్య ఎక్కువగా హెయిర్‌ స్టైల్స్‌ చేయించుకుంటున్నారు. అందంగా ఉండాలని ఈ ప్రయోగాలు చేస్తున్నప్పటికీ అవి కురుల ఆరోగ్యాన్ని దెబ్బతీస్తాయి. మరీ ఎక్కువగా హెయిర్‌ స్టైల్స్‌ చేయించుకోకూడదు.

ఏది పడితే అది వద్దు: ప్రస్తుతం మార్కెట్‌లో రకరకాల సీరమ్‌లు అందుబాటులో ఉన్నాయి. అలా అని ఎక్కువగా వాడేయకూడదు. దీని వల్ల హెయిర్‌ డామేజ్‌ అయ్యే అవకాశాలున్నాయి.

వీటితో పాటు మంచి నిద్ర, ఒత్తిడి లేని జీవితంతో కురులు ఆరోగ్యంగా ఉంటాయి. అందుకే ఏ విషయం గురించైనా ఎక్కువగా ఆలోచించకండి. సమయానికి ఆహారం తీసుకోండి. రోజూ వ్యాయామం చేయండి.