Sundar Naidu Uppalapati: అశ్రునయనాల మధ్య సుందరనాయుడు అంత్యక్రియలు

చిత్తూరు: బాలాజీ హేచరీస్‌ అధినేత, ప్రముఖ పారిశ్రామికవేత్త ఉప్పలపాటి సుందరనాయుడు (85) అంత్యక్రియలు చిత్తూరు సుందరనగర్‌లోని బాలాజీ హేచరీస్‌ ఆవరణలో నిర్వహించారు. సోదరుని కుమారుడు రమేశ్‌బాబు... అంతిమసంస్కారాలు నిర్వహించారు. అంతకుముందు సుందరనాయుడు భౌతికకాయానికి పలువురు ప్రముఖులు నివాళులర్పించారు. ఆయన కుమార్తె, మార్గదర్శి ఎండీ శైలజను ఓదార్చారు. వేలమంది రైతులు, యువతను కోళ్ల పరిశ్రమవైపు నడిపించి వారి జీవితాల్లో వెలుగులు నింపిన మార్గదర్శి సుందరనాయుడని కొనియాడారు. సుందరనాయుడు హైదరాబాద్‌లోని ఓ ప్రైవేటు ఆసుపత్రిలో హృద్రోగ సమస్యకు చికిత్స పొందుతూ గురువారం సాయంత్రం తుదిశ్వాస విడిచిన విషయం తెలిసిందే. పశువైద్యుడిగా వృత్తిని ప్రారంభించిన ఆయన... కోళ్ల పరిశ్రమలో ప్రవేశించి ఆ రంగం అభివృద్ధికి అపార కృషిచేశారు. ఉమ్మడి ఆంధ్రప్రదేశ్‌లో తొలితరం పారిశ్రామికవేత్తగా గుర్తింపు పొందారు.