KTR: తెలంగాణలో ఫెర్రింగ్‌ ఫార్మా సంస్థ కార్యకలాపాల విస్తరణ.. రూ.500 కోట్ల పెట్టుబడి

దావోస్‌: స్విట్జర్లాండ్‌కు చెందిన ఫార్మా కంపెనీ ఫెర్రింగ్ ఫార్మా తెలంగాణలో తన కార్యకలాపాలను విస్తరించనుంది. సుమారు రూ.500 కోట్లతో విస్తరణ ప్రణాళికలను కంపెనీ ప్రకటించింది. దావోస్‌లోని తెలంగాణ పెవిలియన్‌లో మంత్రి కేటీఆర్‌తో ఫెర్రింగ్ ఫార్మా కార్యనిర్వాహక ఉపాధ్యక్షుడు అలెస్‌ఆండ్రో గిలియో, ప్రతినిధి బృందం సమావేశమైంది. భారతదేశంలో తన విస్తరణ ప్రణాళికలకు తెలంగాణ రాష్ట్రాన్ని ఎంచుకున్నట్లు వారు ప్రకటించారు. క్రోన్, అల్సారేటివ్ కోలైటిస్ వంటి వ్యాధుల చికిత్సలో ఉపయోగించే తన ట్రేడ్ మార్క్ పెంటసాను ఉత్పత్తి చేసేందుకు నూతన ప్లాంట్‌ను వినియోగించనున్నట్లు కంపెనీ తెలిపింది. ప్రపంచంలోనే అతి పెద్ద మేసాలజైన్, ఏపీఐ తయారీదారుల్లో ఒకటిగా ఉన్న ఫెర్రింగ్ ఫార్మా ప్రస్తుతం వివిధ దేశాల నుంచి తన ఉత్పత్తులను తయారు చేస్తుంది. వీటికి అదనంగా హైదరాబాద్ నగరంలో తన ఫార్ములేషన్ యూనిట్ ఏర్పాటు చేస్తున్నట్లు ఫెర్రింగ్ కంపెనీ తెలిపింది.

ఫెర్రింగ్ ఫార్మా హైదరాబాద్‌లో తన విస్తరణ ప్రణాళికలు ప్రకటించడం పట్ల మంత్రి కేటీఆర్ హర్షం వ్యక్తం చేశారు. కేవలం నెల రోజుల క్రితమే కంపెనీ యూనిట్‌ను హైదరాబాద్ లో ప్రారంభించానని, ఇంత త్వరగా కంపెనీ అదనంగా మరో రూ.500 కోట్లు పెట్టుబడిగా పెట్టడం తెలంగాణలో ఉన్న అపార పెట్టుబడి అవకాశాలకు నిదర్శనమన్నారు. కేవలం దేశీయ కంపెనీలకే కాకుండా అంతర్జాతీయ విదేశీ కంపెనీలకు సైతం తెలంగాణ అత్యంత అనుకూలంగా ఉందనే విషయాన్ని ఈ పెట్టుబడి ప్రకటన నిరూపిస్తోందని కేటీఆర్ చెప్పారు. తెలంగాణ రాష్ట్ర వ్యాపార, వాణిజ్య, ఉపాధి కల్పన అనుకూల కార్యక్రమాల వల్లే ఇది సాధ్యమైందని పేర్కొన్నారు. తెలంగాణలో విస్తరణకు పెట్టుబడి పెడుతున్న  ఫెర్రింగ్ ఫార్మా కంపెనీకి ఈ సందర్భంగా కేటీఆర్ ధన్యవాదాలు తెలిపారు.