Telangana news: మార్కెటింగ్‌ అవకాశాలు కల్పించేందుకు కృషి: తలసాని

హైదరాబాద్‌: పెరుగుతున్న మత్స్య సంపదకు అనుగుణంగా మార్కెటింగ్ అవకాశాలు కల్పించేందుకు ప్రభుత్వం చర్యలు తీసుకుంటుందని రాష్ట్ర పశుసంవర్ధకశాఖ మంత్రి తలసాని శ్రీనివాస్ యాదవ్ పేర్కొన్నారు. రాష్ట్రం నుంచి ఇతర ప్రాంతాలకు మత్స్య సంపదను ఎగుమతి చేయడం, మత్స్యకారుల కుటుంబాల ఆదాయం పెంచటమే లక్ష్యంగా పనిచేస్తున్నామని తెలిపారు. హైదరాబాద్‌లో జిల్లా మత్స్య శాఖ అధికారులతో ఆయన వీడియో కాన్ఫరెన్స్ నిర్వహించారు. ఈ సందర్భంగా మత్స్య శాఖ ఆధ్వర్యంలో చేపట్టిన నూతన మత్స్య పారిశ్రామిక సహకార సంఘాల రిజిస్ట్రేషన్ ప్రక్రియను తలసాని ప్రారంభించారు. సభ్యత్వ నమోదు స్పెషల్  డ్రైవ్‌కు సంబంధించిన పోస్టర్‌ను ఆవిష్కరించారు. కొత్త సొసైటీలు ఏర్పాటు చేసే క్రమంలో ఎలాంటి వివాదాలకు తావులేకుండా సహకార సంఘాల్లో సభ్యత్వ నమోదు చేయాలని అధికారులకు ఆయన సూచించారు.