Chandrababu: గౌతమ్‌రెడ్డి హుందాగా పని చేశారు: చంద్రబాబు

హైదరాబాద్: ఏపీ మంత్రి గౌతమ్‌రెడ్డి ఆకస్మిక మరణం చాలా బాధాకరమని తెదేపా అధినేత చంద్రబాబు అన్నారు. ఈ ఉదయం గుండెపోటుతో చనిపోయిన గౌతమ్‌రెడ్డి నివాసానికి వెళ్లిన ఆయన.. మంత్రి  పార్థివదేహానికి నివాళులర్పించారు. జూబ్లీహిల్స్‌లోని ఇంటికి వెళ్లి గౌతమ్‌రెడ్డి కుటుంబసభ్యులను పరామర్శించిన అనంతరం చంద్రబాబు మీడియాతో మాట్లాడారు. తెల్లవారుజాము వరకు ఆరోగ్యంగా ఉండి జిమ్‌కు వెళ్తున్న సమయంలో ఛాతీలో నొప్పి రావడంతో గౌతమ్‌రెడ్డిని అపోలోకు తరలించారన్నారు. ఆస్పత్రికి వెళ్లే సరికే శ్వాస ఆడని పరిస్థితి నుంచి హఠాన్మరణం చెందడం విచారకరమని చెప్పారు.

గౌతమ్‌రెడ్డి ఇటీవల దుబాయ్‌లో పర్యటనకు సంబంధించి టీవీలో వార్తలు చూసినట్లు చంద్రబాబు తెలిపారు. గౌతమ్‌రెడ్డి వివాదాల జోలికి పోకుండా హుందాగా, సమర్థంగా పని చేశారని కొనియాడారు.గౌతమ్‌రెడ్డి ఆత్మకు శాంతి కలగాలని.. ఆయన కుటుంబ సభ్యులు ధైర్యంగా ఉండాలని ఆకాంక్షించారు.