Andhra News: బోధనేతర విధుల నుంచి ఉపాధ్యాయులకు ఊరట.. నోటిఫికేషన్‌ జారీ

అమరావతి: ఆంధ్రప్రదేశ్‌లోని ఉపాధ్యాయులను బోధనేతర విధుల నుంచి తప్పిస్తూ పాఠశాల విద్యాశాఖ నోటిఫికేషన్ జారీ చేసింది. రాష్ట్ర ప్రభుత్వం అమలు చేస్తున్న అమ్మఒడి, గోరుముద్ద, విద్యాకానుక, ట్యాబ్‌ల పంపిణీ, సీబీఎస్ఈ ఆంగ్ల మాధ్యమం తదితర అంశాల పర్యవేక్షణ రీత్యా ఉపాధ్యాయులను బోధనేతర విధుల నుంచి తప్పిస్తూ నిర్ణయం తీసుకుంది. ఈ మేరకు చట్ట సవరణ చేస్తూ ప్రభుత్వం నోటిఫికేషన్ జారీ చేసింది. బోధనేతర విధుల నుంచి ఉపాధ్యాయులను తప్పించే నిబంధనల సవరణకు సంబంధించిన అంశంపై రాష్ట్ర ప్రభుత్వం కేబినెట్ ఆమోదాన్ని కూడా తీసుకుంది. వర్చువల్ కేబినెట్ ద్వారా మంత్రులకు పంపి డిజిటల్ సంతకాలతో ఈ సవరణ చేసింది.

నిర్బంధ విద్యాహక్కు చట్టం-2009 కూడా ఉపాధ్యాయులను బోధనేతర విధులకు వినియోగించడంపై నిషేధం విధించాలని సూచిస్తోందని ప్రభుత్వం నోటిఫికేషన్‌లో పేర్కొంది. నిబంధనలు సవరించిన నేపథ్యంలో ఉపాధ్యాయులు విద్యాబోధన అంశాలపై మాత్రమే దృష్టి సారించాలని ప్రభుత్వం పేర్కొంది. తప్పనిసరి పరిస్థితుల్లో మాత్రమే ఇతర ప్రభుత్వ సిబ్బంది అందుబాటులో లేనప్పుడు ఉపాధ్యాయుల సేవలను వినియోగించుకుంటామని రాష్ట్ర ప్రభుత్వం నిబంధనల సవరణ నోటిఫికేషన్‌లో పేర్కొంది.