CM KCR: తెలంగాణ మంత్రివర్గ సమావేశం ప్రారంభం.. కీలక అంశాలపై చర్చ

హైదరాబాద్‌: ముఖ్యమంత్రి కేసీఆర్‌ అధ్యక్షతన గురువారం మధ్యాహ్నం మంత్రివర్గ సమావేశం ప్రారంభమైంది. డాక్టర్‌ బీఆర్‌ అంబేడ్కర్‌ నూతన సచివాలయాన్ని ప్రారంభించిన తర్వాత ఇందులో నిర్వహిస్తున్న మొదటి మంత్రివర్గ సమావేశం ఇదే. జూన్‌ 2 నుంచి 21 రోజుల పాటు రాష్ట్ర ప్రభుత్వం ప్రతిష్ఠాత్మకంగా నిర్వహించనున్న తెలంగాణ రాష్ట్ర అవతరణ దశాబ్ది ఉత్సవాలపై కేబినెట్‌ భేటీలో చర్చించనున్నట్లు తెలుస్తోంది. గవర్నర్‌ కోటాలో ఎమ్మెల్సీల ఎంపిక, గవర్నర్‌ తిరస్కరించిన బిల్లులను తిరిగి ఆమోదించడానికి శాసనసభ సమావేశాలను నిర్వహించడం, రాష్ట్రం ఆవిర్భవించి పదో సంవత్సరంలోకి అడుగుపెడుతున్న శుభ తరుణాన ప్రజలకు మేలు చేకూర్చే ఏదైనా కొత్త పథకం ప్రకటన.. తదితర అంశాలపై చర్చించే అవకాశాలున్నట్లు సమాచారం.