MLAs Bribery case: ఎమ్మెల్యేలకు ఎర కేసు.. హైకోర్టులో సిట్‌ లంచ్‌ మోషన్‌ పిటిషన్‌

హైదరాబాద్‌: ఎమ్మెల్యేలకు ఎర కేసులో ప్రత్యేక దర్యాప్తు బృందం (సిట్‌) వేసిన లంచ్‌ మోషన్‌ పిటిషన్‌పై విచారించేందుకు హైకోర్టు అంగీకరించింది. దిల్లీ పోలీసులు విచారణకు సహకరించడం లేదని పిటిషన్‌లో సిట్‌ పేర్కొంది. దిల్లీలో ఓ వ్యక్తికి నోటీసులు ఇచ్చేందుకు పోలీసులు అనుమతించడం లేదని తెలిపింది. ఈ కేసు విచారణకు అంతరాయం కలిగించొద్దని దిల్లీ సీపీని ఆదేశించాలని సిట్‌ కోరింది. ఈ మేరకు సిట్‌ పిటిషన్‌పై విచారణ చేపట్టేందుకు హైకోర్టు సింగిల్‌ బెంచ్‌ అంగీకరించింది.

మరోవైపు ఈ కేసులో బీఎల్‌ సంతోష్‌, శ్రీనివాస్‌కు సిట్‌ నోటీసులు జారీ చేసిన విషయం తెలిసిందే. బీఎల్‌ సంతోష్‌, శ్రీనివాస్‌లకు సిట్‌ ఇచ్చిన నోటీసులపై స్టే ఇవ్వాలని భాజపా నేత ప్రేమేందర్ రెడ్డి హైకోర్టులో పిటిషన్‌ దాఖలు చేశారు. దీనిపైనా అత్యవసర విచారణకు హైకోర్టు అంగీకరించింది.