AP High Court: రాజధాని వ్యాజ్యాలపై విచారణ వాయిదా

అమరావతి: రాజధాని వ్యాజ్యాలపై విచారణ వాయిదా పడింది. నవంబరు 15కి వాయిదా వేస్తూ సీజే ధర్మాసనం నిర్ణయం తీసుకుంది. కరోనా కేసులు పెరుగుతున్న దృష్ట్యా విచారణ వాయిదా వేయాలని పిటిషనర్లు, వాళ్ల తరఫు న్యాయవాదులు కోర్టుకు విజ్ఞప్తి చేశారు. దేశంలో పరిస్థితుల దృష్ట్యా హైకోర్టే నిర్ణయం తీసుకోవాలని.. ప్రభుత్వ న్యాయవాదులు వాయిదా నిర్ణయాన్ని కోర్టుకే వదిలేశారు. దేశంలో, రాష్ట్రంలో నమోదవుతున్న కేసులను పరిగణనలోకి తీసుకొని సీజే ధర్మాసనం విచారణను వాయిదా వేసింది.

పాలన వికేంద్రీకరణ, సీఆర్‌డీఏ రద్దు చట్టాలను సవాలు చేస్తూ దాఖలైన రాజధాని వ్యాజ్యాలపై చీఫ్‌ జస్టిస్‌ నేతృత్వంలోని ధర్మాసనం ఈ ఏడాది మార్చి 26న మొదటిసారి విచారణ జరిపింది. అప్పుడు తదుపరి విచారణను మే 3కు వాయిదా వేసింది. ఆ రోజు వ్యాజ్యాలు విచారణకు రాగా కొవిడ్‌ నేపథ్యంలో న్యాయవాదుల అభ్యర్థన మేరకు ఇవాళ్టికి ధర్మాసనం వాయిదా వేసిన విషయం తెలిసిందే. ఈ వ్యాజ్యాలపై ఇవాళ కూడా విచారణ జరిగి మరోసారి వాయిదా పడింది.