Hyderabad News: అరుదైన వస్తు సంపదకు వెలకట్టలేం: శ్రీనివాస్‌గౌడ్‌

హైదరాబాద్‌: చరిత్రకు ప్రతీకగా నిలిచే పురాతన వారసత్వ వస్తు సంపదను కాపాడుకోవాల్సిన బాధ్యత అందరిపై ఉందని రాష్ట్ర పర్యాటక, సాంస్కృతిక శాఖ మంత్రి శ్రీనివాస్‌గౌడ్‌ తెలిపారు. అనాటి అరుదైన వస్తు సంపదను సంరక్షించేందుకు ప్రత్యేక చర్యలు తీసుకొని భద్రపరుస్తామని వెల్లడించారు. హైదరాబాద్‌ మాదాపూర్‌లోని స్టేట్‌ ఆర్ట్‌ గ్యాలరీలో ‘అద్య కళ’ పేరిట ఏర్పాటు చేసిన ఎగ్జిబిషన్‌ను మంత్రి సందర్శించారు. ఆదివాసీ, గిరిజనులు వినియోగించిన పలు వాయిద్య పరికరాలు, కళారూపాలు, వివిధ ఆకృతులను ఒక్క చోట చేర్చి ఏర్పాటు చేయడం అభినందనీయమన్నారు. ప్రదర్శనలోని వాయిద్య సాధనాలు, విగ్రహాలు, వివిధ ఆకృతులు, చిత్రాలను భద్రపరిచేందుకు ప్రత్యేక మ్యూజియం ఏర్పాటుకు కృషి చేస్తానన్నారు. ఇలాంటి ఆరుదైన వస్తు సంపదకు వెలకట్టలేమన్నారు.