Amaravati Padayatra: అమరావతి రైతుల మహా పాదయాత్రకు పూలబాట

అమరావతి: అమరావతినే ఆంధ్రప్రదేశ్‌ రాష్ట్ర ఏకైక రాజధానిగా కొనసాగించాలంటూ రాజధాని రైతులు, మహిళలు చేపట్టిన మహాపాదయాత్ర మూడో రోజు దిగ్విజయంగా సాగింది. న్యాయస్థానం నుంచి దేవస్థానం పేరుతో చేపట్టిన ఈ యాత్ర ఇవాళ గుంటూరు శివారు అమరావతి రోడ్డు నుంచి ప్రారంభమై... పుల్లడిగుంట, వింజనంపాడు గ్రామాల వద్ద ముగిసింది. గుంటూరు జిల్లాలో ప్రజల నుంచి అడుగడుగునా అపూర్వ ఆదరణ లభిస్తోంది. యాత్రకు హారతులు పడుతూ నిరాటంకంగా సాగాలని ఆకాంక్షిస్తున్నారు. గుంటూరు నగరం దాటుకుని సాయంత్రం 4గంటలకు ప్రత్తిపాడు నియోజకవర్గంలోకి అడుగుపెట్టగా..ఏటుకూరు బైపాస్‌ వద్ద స్థానిక ప్రజలు, మాజీ మంత్రి నక్కా ఆనందబాబు, తెలుగుదేశం నాయకులు అఖండ స్వాగతం పలికారు. యాత్రలో కదిలి వస్తున్న వేంకటేశ్వరుడి వాహనంతో పాటు, రైతులు, మహిళలపై బంతిపూలు చల్లుతూ స్వాగతం పలికారు. రాజధాని రైతులను పూల బాటపై నడిపించారు. ఫ్లైఓవర్‌ పైనుంచి పూలు చల్లుతూ యాత్ర విజయవంతం కావాలని నినాదాలు చేశారు. రాజధాని కోసం 33వేల ఎకరాలు త్యాగం చేసిన రైతుల సంకల్పం నెరవేరుతుందని, అమరావతికి ఎలాంటి ఢోకా ఉండదని అభిప్రాయపడ్డారు. అనంతరం పాదయాత్ర పుల్లడిగుంట, వింజనంపాడు చేరుకోగా  మహిళలు గుమ్మడికాయలతో హారతులు ఇచ్చి స్వాగతం పలికారు.