Cm jagan: ఏపీ కార్మికులను భారత్‌కు తీసుకురావాలి.. కేంద్ర మంత్రి జైశంకర్‌కు జగన్ లేఖ

అమరావతి: బహ్రెయిన్‌లో పనిచేస్తున్న ఆంధ్రప్రదేశ్‌ కార్మికులను స్వదేశానికి రప్పించేలా చర్యలు తీసుకోవాలని ఏపీ ముఖ్యమంత్రి వైఎస్‌ జగన్‌మోహన్‌ రెడ్డి కేంద్ర ప్రభుత్వాన్ని కోరారు. ఈ మేరకు కేంద్ర విదేశాంగ శాఖ మంత్రి జైశంకర్‌కు జగన్‌ లేఖ రాశారు. బహ్రెయిన్‌లో పనిచేస్తున్న కార్మికుల్లో ఏపీకి చెందినవారు అధికంగా ఉన్నారని లేఖలో వివరించారు. అక్కడ వారిని ఆయా కంపెనీలు ఇబ్బంది పెడుతున్నాయని పేర్కొన్నారు. వారిని త్వరగా భారత్‌కు రప్పించేలా చర్యలు తీసుకోవాలని కేంద్ర మంత్రి జైశంకర్‌కు విజ్ఞప్తి చేశారు. బహ్రెయిన్‌ నుంచి కార్మికులను స్వదేశానికి తీసుకొచ్చే విషయంలో ఏపీ ప్రభుత్వం నుంచి కేంద్ర ప్రభుత్వానికి పూర్తి సహకారం ఉంటుందని స్పష్టం చేశారు. ఈ విషయంలో ఏపీ సీఎంవో కార్యాలయం అధికారులు కార్మికులకు సంబంధించిన అన్ని వివరాలు ఇచ్చేందుకు సిద్ధంగా ఉన్నట్లు లేఖలో వివరించారు.