AP High Court: తితిదే బోర్డులో నేరచరిత్ర ఉన్నవారి నియామకంపై హైకోర్టు ఆగ్రహం

అమరావతి: తిరుమల తిరుపతి దేవస్థానం(తితిదే) బోర్డులో నేర చరిత్ర ఉన్నవారి నియామకంపై ఏపీ హైకోర్టు ఆగ్రహం వ్యక్తం చేసింది. తితిదే పాలకమండలి నియామకాన్ని సవాల్‌ చేస్తూ భాజపా నేత భానుప్రకాశ్‌రెడ్డి దాఖలు చేసిన పిటిషన్‌పై ఇవాళ విచారణ జరిగింది. పిటిషనర్‌ తరఫున న్యాయవాది అశ్వినికుమార్‌ వాదనలు వినిపించారు. ఎంసీఐ మాజీ ఛైర్మన్‌ డా.కేతన్‌ దేశాయ్‌ నియామకంపై అశ్వినికుమార్‌ అభ్యంతరం వ్యక్తం చేశారు. దీనిపై స్పందించిన ఉన్నత న్యాయస్థానం.. తితిదే కార్యనిర్వాహణాధికారి, దేవాదాయ శాఖ ముఖ్య కార్యదర్శితో పాటు మొత్తం 18 మంది సభ్యులకు నోటీసులు జారీ చేసింది. మూడు వారాల్లోగా కౌంటర్‌ దాఖలు చేయాలని హైకోర్టు వారిని ఆదేశించింది.