JNV: ఆగస్టు 31 నుంచి ‘నవోదయ’లో తరగతులు పునఃప్రారంభం

దిల్లీ: దేశంలో కరోనా ఉద్ధృతి తగ్గడంతో దశల వారీగా తరగతులు నిర్వహించేందుకు పలు రాష్ట్రాల ప్రభుత్వాలు చర్యలు తీసుకొంటున్న విషయం తెలిసిందే. ఈ నేపథ్యంలో జవహర్‌ నవోదయ విద్యాలయ సమితి కీలక నిర్ణయం తీసుకుంది. ఈ నెల 31నుంచి దశల వారీగా తరగతులు పునఃప్రారంభించనున్నట్టు వెల్లడించింది. తొలుత 9 నుంచి 12వ తరగతి విద్యార్థులకు 50శాతం సిటింగ్‌ సామర్థ్యంతో తరగతులు నిర్వహించనుంది. ఈ నెల 31 నుంచి విద్యార్థులు తరగతులకు హాజరు కావడంతో పాటు తల్లిదండ్రుల సమ్మతితో హాస్టళ్లలో కూడా ఉండేందుకు అవకాశం కల్పిస్తున్నట్టు కేంద్ర విద్యాశాఖ తెలిపింది. కొవిడ్‌ నిబంధనల మేరకు అన్ని చర్యలు తీసుకోనున్నారు. ఆన్‌లైన్‌ విద్యబోధన కూడా కొనసాగుతుందని అధికారులు స్పష్టంచేశారు.