telugu academy: డిపాజిట్ల గోల్‌మాల్‌ ఎలా జరిగింది?: సిబ్బందిని ప్రశ్నించిన త్రిసభ్య కమిటీ

హైదరాబాద్‌: తెలుగు అకాడమీ ఫిక్స్‌డ్‌ డిపాజిట్ల గోల్‌మాల్‌పై ప్రభుత్వం నియమించిన త్రిసభ్య కమిటీ విచారణ ప్రారంభించింది. హైదరాబాద్‌ హిమాయత్‌ నగర్‌లోని తెలుగు అకాడమీకి చేరుకున్న అధికారులు తనిఖీలు చేపట్టారు. అకాడమీలో పనిచేస్తున్న ఉద్యోగులను ఒక్కొక్కరినీ పిలిచి నిధుల గోల్‌మాల్‌పై ఆరా తీస్తున్నారు. కమిటీ హెడ్‌, ఇంటర్‌ బోర్డు కార్యదర్శి ఉమర్‌ జలీల్‌ ఆధ్వర్యంలో ప్రతి రికార్డును క్షుణ్ణంగా పరిశీలిస్తున్నారు. ఇంటర్‌బోర్డు కార్యదర్శితో పాటు బోర్డులోని అకౌంట్స్‌ అధికారి, కళాశాల విద్యాశాఖ సంయుక్త సంచాలకుడు విచారణ కమిటీలో సభ్యులుగా ఉన్నారు. ఈ వ్యవహారంపై అక్టోబరు 2వ తేదీలోపు నివేదిక అందజేయాలని ప్రభుత్వం ఆదేశించింది. మరోపక్క హైదరాబాద్‌ పోలీసులు లెక్కలు తేల్చే పనిలో నిమగ్నమయ్యారు.