Ap News: తిరుమ‌ల శ్రీవారి ఆలయంలో శాస్త్రోక్తంగా దీపావళి ఆస్థానం

తిరుమల: కలియుగ ప్రత్యక్ష దైవం తిరుమల శ్రీవేంకటేశ్వర స్వామివారి ఆలయంలో శాస్త్రోక్తంగా దీపావళి ఆస్థానం జరిగింది. ఆలయ అర్చకులు, తిరుమల జీయంగార్లు, తిరుమల తిరుపతి దేవస్థానం (తితిదే) ఉన్నతాధికారుల సమక్షంలో ఆగమోక్తంగా ఆస్థాన వేడుకను బంగారువాకిలి చెంత నిర్వహించారు. బంగారువాకిలి ముందున్న ఘంటా మండపంలో శ్రీ‌దేవి, భూదేవి స‌మేత శ్రీమలయప్పస్వామివారు, శ్రీ విష్వక్సేనుల వారి ఉత్సవమూర్తులను గరుడాళ్వారు సన్నిధిలో అభిముఖంగా ఉంచి ఆస్థానం నిర్వహించారు. మంగళవాయిద్యాలు, వేద మంత్రోచ్ఛరణల మధ్య దీపావళి ఆస్థానం నిర్వహించారు. అంత‌కుముందు ఆల‌యంలో మూలవిరాట్టుకు, ఇతర దేవతా మూర్తులకు పట్టు వస్త్రాలు సమర్పించి ప్రత్యేక హారతులు నివేదించారు.