Warangal: ఉచిత పోలీసు శిక్షణ అర్హత పరీక్షకు పోటెత్తిన అభ్యర్థులు

వరంగల్‌: రాష్ట్రంలో నిరుద్యోగ సమస్య తీవ్రత ఎలా ఉందో హనుమకొండ లోని ఆర్ట్స్ అండ్ సైన్స్ కళాశాలలోని ఈ దృశ్యాలు చూస్తే తెలుస్తుంది. పోలీసు నియామకాల కోసం వరంగల్‌ పోలీస్‌ కమిషనరేట్‌ ఆధ్వర్యంలో నిర్వహించే ఉచిత కోచింగ్‌ కోసం గురువారం అర్హత పరీక్ష నిర్వహించారు. పరీక్షకు హాజరయ్యేందుకు యువతీ యువకులు పెద్ద ఎత్తున హాజరయ్యారు. పరీక్షకు మొత్తం 6,418 మంది అభ్యర్థులు దరఖాస్తు చేసుకున్నారు. అభ్యర్థులకు గురువారం వరంగల్‌, హనుమకొండ, నర్సంపేట, పరకాల, జనగాం పట్టణాల్లో అర్హత పరీక్ష నిర్వహించారు. ఈ పరీక్షను మల్టిపుల్‌ ఛాయిస్‌ పద్దతిలో నిర్వహించారు. ఈ అర్హత పరీక్షలో అభ్యర్థులు సాధించిన మెరిట్‌ మార్కుల ఆధారంగా ఉచిత కోచింగ్‌కు ఎంపిక చేయనున్నట్టు  పోలీస్‌ కమిషనర్‌ తరుణ్‌ జోషి తెలిపారు. ఉచిత శిక్షణ కోసం వరంగల్‌ పోలీస్‌ కమిషనరేట్‌ పరిధిలో మొత్తం 6 కోచింగ్‌ సెంటర్లు ఏర్పాటు చేసినట్టు చెప్పారు.