AP News: విశాఖ మన్యంలో మరింత తగ్గిన ఉష్ణోగ్రతలు.. లంబసింగిలో ఎంతంటే..

విశాఖపట్నం: విశాఖపట్నం జిల్లాల్లోని మన్యం ప్రాంతంలో ఉష్ణోగ్రతలు మరింత క్షీణించాయి. పాడేరు, చింతపల్లి, లంబసింగి ప్రాంతాల్లో చలి తీవ్రత మరింత ఎక్కువైంది. ఇటీవల వరకు సుమారు 8 డిగ్రీల ఉష్ణోగ్రత నమోదవగా.. ఈరోజు మరింత తక్కువకు పడిపోయింది. లంబసింగిలో 3.8 డిగ్రీలు, చింతపల్లిలో 5 డిగ్రీల కనిష్ట ఉష్ణోగ్రత నమోదైంది. చలిగాలుల తీవ్రత మరింత ఎక్కువ కావడంతో ఇళ్ల నుంచి బయటకు రావాలంటేనే గిరిజనులు వణికిపోతున్నారు. 

మన్యంలోని అన్ని ప్రాంతాల్లోనూ దాదాపు ఇదే తరహా వాతావరణం ఉంది. గత మూడురోజులుగా చలి తీవ్రత అధికమైంది. మధ్యాహ్నం 3 గంటల నుంచే చలిగాలులు వీస్తున్నాయి. ఉదయం 10 గంటల వరకూ పొగమంచు దట్టంగా కురుస్తోంది. మంచు తీవ్రతతో వ్యవసాయ పనులకు వెళ్లే గిరిజనులు, పాఠశాలలకు వెళ్లే విద్యార్థులు తీవ్ర ఇబ్బందులు పడుతున్నారు.