TS News: రూ.10వేల కోట్లతో ఆరోగ్యశాఖ బలోపేతం: హరీశ్‌రావు

హైదరాబాద్‌: తెలంగాణలో రాబోయే రోజుల్లో రూ.10వేల కోట్లు కేటాయించి ఆరోగ్య శాఖను బలోపేతం చేసే దిశగా చర్యలు చేపట్టామని వైద్యారోగ్యశాఖ మంత్రి హరీశ్‌రావు అన్నారు. హైదరాబాద్‌ నిలోఫర్ ఆస్పత్రిలో వంద పడకల ఐసీయూ వార్డును ఇవాళ ఆయన ప్రారంభించారు. ఈ సందర్బంగా హరీశ్‌రావు మీడియాతో మాట్లాడారు. రూ.33 కోట్లతో నిలోఫర్‌లో మరో 800పడకలు అందుబాటులోకి తీసుకొస్తామన్నారు. ప్రభుత్వాసుపత్రుల్లో కార్పొరేట్‌ వైద్యానికి దీటుగా సేవలను అందించాలని వైద్యులను కోరారు. హైదరాబాద్‌కు నలువైపులా నాలుగు మెడికల్‌ టవర్లను తీసుకురావాలని కృషి చేస్తున్నట్లు హరీశ్‌రావు స్పష్టం చేశారు. వైద్యారోగ్యశాఖ మంత్రిగా బాధ్యతలు చేపట్టిన తర్వాత మొదటి కార్యక్రమం నిలోఫర్‌లో పాల్గొనడం సంతోషంగా ఉందని ఉందని చెప్పారు.

‘‘తెలంగాణలో కరోనా రెండో దశ తర్వాత ప్రభుత్వ ఆస్పత్రులు బలోపేతమయ్యాయి. వ్యాక్సినేషన్‌లో దేశ సగటు కంటే తెలంగాణ ముందుంది. కరోనా మూడో దశ సన్నద్ధతకు రూ.133కోట్లు కేటాయించాం. చిన్నపిల్లల కోసం 5వేల పడకలను సిద్ధం చేశాం.  కేసీఆర్‌ కిట్‌తో ప్రభుత్వ ఆస్పత్రుల్లో ప్రసవాలు 30శాతం నుంచి 50శాతం పెరిగాయి. తల్లి, శిశు మరణాలు గణనీయంగా తగ్గాయి. మరో 8 వైద్య కళాశాలలు అందుబాటులోకి వచ్చాయి’’ అని హరీశ్‌రావు అన్నారు.