KTR: డబుల్‌ బెడ్‌రూం ఇళ్లకు ఎలాంటి పైరవీలూ అవసరం లేదు: కేటీఆర్‌

హైదరాబాద్‌: నిరుపేదలకు రూ.40లక్షల ఇంటిని ఉచితంగా అందిస్తున్నామని తెలంగాణ మంత్రి కేటీఆర్‌ అన్నారు. ‘ఇల్లు కట్టి చూడు.. పెళ్లి చేసి చూడు’ అని పెద్దలు అన్నారని.. ఇల్లు నేనే కట్టిస్తా.. పెళ్లీ నేనే చేస్తానన్న ఏకైక సీఎం కేసీఆరేనని చెప్పారు. నగరంలోని బన్సీలాల్‌పేట్‌లో డబుల్‌ బెడ్‌రూం ఇళ్లను కేటీఆర్‌ ప్రారంభించారు. ఈ సందర్భంగా ఆయన మాట్లాడుతూ ప్రభుత్వం రూ.11వేల కోట్లు ఖర్చు చేసి డబుల్‌ బెడ్‌రూం ఇళ్లు కట్టిందన్నారు. నగరంలోని పేదలందరికీ ఇళ్లు వచ్చేలా చూస్తామని.. ఈ విషయలో ఎలాంటి పైరవీలూ ఉండవని స్పష్టం చేశారు. లాటరీ పద్ధతిలో బస్తీవాసులకు ఇళ్లు కేటాయిస్తున్నట్లు చెప్పారు.