KTR: రాష్ట్రంలో కరోనా నియంత్రణలోనే ఉంది: కేటీఆర్‌

హైదరాబాద్‌: రాష్ట్రంలో ప్రస్తుతం కరోనా నియంత్రణలో ఉందని.. వ్యాక్సినేషన్‌ కార్యక్రమం కూడా వేగంగా సాగుతోందని తెలంగాణ పురపాలక శాఖ మంత్రి కేటీఆర్‌ అన్నారు. హైదరాబాద్‌ సనత్‌నగర్‌ సెయింట్‌ థెరిసా ఆస్పత్రికి టెక్‌ మహీంద్రా సంస్థ అందించిన 7 అంబులెన్స్‌లు, ఆక్సిజన్‌ ప్లాంట్‌ను మంత్రి ప్రారంభించారు. ఈ సందర్భంగా ఆయన మాట్లాడుతూ మహీంద్రా గ్రూప్‌ ఒక్క రంగానికే పరిమితం కాలేదని.. అనేక రంగాల్లో ముందుకెళ్తోందని చెప్పారు. టెక్‌ మహీంద్రా యూనివర్సిటీని కూడా ఇక్కడే ఏర్పాటు చేశారని కేటీఆర్‌ గుర్తు చేశారు. కరోనా మహమ్మారి ప్రజలను ఇబ్బంది పెడుతోందని.. ఈ పరిస్థితుల్లో ఆక్సిజన్‌ ప్లాంట్‌, అంబులెన్స్‌లు అందించడంపై ఆయన హర్షం వ్యక్తం చేశారు. మరిన్ని సామాజిక కార్యక్రమాల్లో భాగస్వాములు కావాలని టెక్‌ మహీంద్రా ఫౌండేషన్‌ ప్రతినిధులకు ఆయన సూచించారు.