TS News: నెల రోజుల్లో డ్రగ్స్‌ రహిత రాష్ట్రమే లక్ష్యం: శ్రీనివాస్‌గౌడ్‌

హైదరాబాద్‌: తెలంగాణలోని పలు ప్రాంతాల్లో అక్రమంగా తరలిస్తున్న మాదక ద్రవ్యాలను పట్టుకున్న పలువురు ఆబ్కారీశాఖ అధికారులను మంత్రి శ్రీనివాస్‌గౌడ్‌ సన్మానించారు. నిన్న రూ.2కోట్లు విలువైన మెపిడ్రిన్‌ డ్రగ్‌ను గుర్తించి పోలీసులు సీజ్‌ చేసిన విషయం తెలిసిందే. ఈ నేపథ్యంలో నగరంలోని తన క్యాంపు కార్యాలయంలో మంత్రి.. అధికారులను ఘనంగా సన్మానించారు. అనంతరం శ్రీనివాస్‌గౌడ్‌ మాట్లాడారు. నెల రోజుల్లో డ్రగ్స్ రహిత రాష్ట్రమే అధికారులు లక్ష్యమన్నారు. ఆబ్కారీ అధికారులు నిఘా చర్యలు చేపట్టాలని ఆదేశించారు. మంచి పనితీరు కనబరిచిన అధికారులకు అవార్డులు ఇస్తామని ప్రకటించారు. సమాచారం అందించిన వారికి ప్రోత్సాహకాలు ఉంటాయని మంత్రి వెల్లడించారు.