NIA: తెలుగు రాష్ట్రాల్లో 14 చోట్ల ఎన్‌ఐఏ సోదాలు

అమరావతి: తెలుగు రాష్ట్రాల్లో జాతీయ దర్యాప్తు సంస్థ (ఎన్‌ఐఏ)సోదాలు నిర్వహిస్తోంది. మొత్తం 14 ప్రాంతాల్లో ఎన్‌ఐఏ అధికారులు తనిఖీలు నిర్వహిస్తున్నారు. తెల్లవారుజామున 5 గంటల నుంచి సోదాలు కొనసాగుతున్నాయి. ప్రకాశం జిల్లా టంగుటూరు మండలం ఆలకూరపాడులో విరసం నేత కల్యాణ్‌రావు ఇంట్లో సోదాలు జరుగుతున్నాయి.

దీంతో పాటు విశాఖపట్నం అరిలోవ కాలనీలోని న్యాయవాద దంపతులు శ్రీనివాసరావు, అన్నపూర్ణ ఇళ్లలోనూ ఎన్‌ఐఏ తనిఖీలు నిర్వహిస్తోంది. హైదరాబాద్‌ నాగోల్‌లో రవిశర్మ, అనురాధ ఇళ్లలోనూ సోదాలు జరుగుతున్నాయి. మావోయిస్టులతో సంబంధాలు.. ఆర్కే జీవిత చరిత్రపై పుస్తకం ప్రచురించే విషయంలోనూ ఎన్‌ఐఏ అధికారులు ఆరా తీస్తున్నారు.