Polytechnic seat allotment: తెలంగాణలో పాలిటెక్నిక్‌ తుది విడత సీట్ల కేటాయింపు పూర్తి

హైదరాబాద్: తెలంగాణ రాష్ట్రంలో పాలిటెక్నిక్‌ తుది విడత సీట్ల కేటాయింపు ప్రక్రియ ముగిసింది. ఈ ఏడాది పాలిసెట్‌లో 75,669 మంది విద్యార్థులు ఉత్తీర్ణులయ్యారు. రాష్ట్రవ్యాప్తంగా 120 కళాశాలల్లో 24,401 (83.98 శాతం) సీట్లు భర్తీ కాగా.. 4,653 (16.02 శాతం) సీట్లు మిగిలిపోయినట్లు రాష్ట్ర సాంకేతిక విద్యా కమిషనర్‌ నవీన్‌ మిత్తల్‌ వెల్లడించారు. రాష్ట్రంలోని 54 ప్రభుత్వ కళాశాలల్లో 11,874 సీట్లు ఉండగా.. 11,624 కేటాయించినట్లు చెప్పారు. 65 ప్రైవేట్ కళాశాలల్లోని 16,950 సీట్లకు 12,550 సీట్లు భర్తీ అయ్యాయన్నారు. తుది విడతలో సీటు పొందిన అభ్యర్థులు ఈనెల 31లోగా ఆన్‌లైన్‌లో సెల్ఫ్ రిపోర్టింగ్ చేసి సెప్టెంబరు 1 నాటికి కళాశాలల్లో చేరాలని మిత్తల్ తెలిపారు. సెప్టెంబరు 1 నుంచి 4వ తేదీ వరకు ఓరియంటేషన్ నిర్వహించి.. 6 నుంచి తరగతులు ప్రారంభించనున్నట్లు వెల్లడించారు.