Viveka Murder Case: సమాచారం అందిస్తే రూ.5లక్షల రివార్డు: సీబీఐ 

కడప: మాజీ మంత్రి వైఎస్‌ వివేకానందరెడ్డి హత్య కేసు దర్యాప్తు చేస్తున్న సీబీఐ కీలక ప్రకటన చేసింది. కేసుకు సంబంధించి సమాచారం అందిస్తే రివార్డు ఇస్తామని పత్రికా ప్రకటన ఇచ్చింది. కచ్చితమైన, నమ్మదగిన సమాచారం ఇస్తే రూ.5లక్షలు అందజేస్తామని స్పష్టం చేసింది. సమాచారం అందించిన వారి వివరాలు గోప్యంగా ఉంచుతామని సీబీఐ అధికారులు వెల్లడించారు. వారు ఫోన్‌ నంబర్ల ద్వారా కానీ, కార్యాలయంలో గానీ తమను సంప్రదించవచ్చని తెలిపారు.

దాదాపు ఏడాది నుంచి ఈ కేసుపై విచారణ చేస్తున్న సీబీఐ అనేక మంది అనుమానితులను ఇప్పటికే పలు దఫాలు ప్రశ్నించింది. మూడు నెలల కిందట నాలుగో దఫా విచారణ చేపట్టిన సీబీఐ.. వరుసగా 76 రోజుల నుంచి విచారణ జరుపుతోంది. ఈ హత్య కేసులో స్పష్టమైన ఆధారాలు సేకరించాల్సి ఉన్నందున.. నమ్మకమైన సమాచారం ఎవరి దగ్గరైనా ఉంటే దాన్ని సేకరించేందుకు సీబీఐ ఈ ప్రకటన ఇచ్చినట్లు తెలుస్తోంది.

మరోవైపు 76వ రోజు కడప కేంద్ర కారాగారంలోని అతిథి గృహంలో అనుమానితులను అధికారులు ప్రశ్నిస్తున్నారు. ఇవాళ విచారణకు వివేకా ఇంట్లో కంప్యూటర్‌ ఆపరేటర్‌గా పనిచేసిన ఇదాయతుల్లా హాజరయ్యారు. హత్య జరిగిన రోజు ముందుగా వివేకా మృతదేహానికి ఇదాయతుల్లానే ఫొటోలు తీసినట్లు గుర్తించారు. అందులో భాగంగానే సీబీఐ అధికారులు అతడిపై ప్రశ్నల వర్షం కురిపిస్తున్నట్లు సమాచారం. అనంతపురం జిల్లాకు చెందిన విజయ్‌ శంకర్‌రెడ్డి కూడా విచారణకు హాజరయ్యారు.